بقلم: ايهاب نجاح جنديه
في زمن بقى الكلام فيه سهل. بس الاحساس فيه نادر.
بقينا نرمي كلمات من غير ما نحسب حسابها.
كلمة ممكن ترفع حد للسما. وكلمة تانية ممكن توقعه في حفرة الحزن.
كلنا محتاجين نسمع “متقلقش. هتبقى كويس”.
“انا وراك”. “ربنا معاك”.
الكلمة دي ممكن تبقى الفرق بين واحد يكمل او يستسلم.
يمكن تكون بالنسبالك جملة بسيطة.
بس بالنسباله امل جديد.
زمان كانوا بيقولوا “الكلمة الطيبة صدقة”.
النهارده بقينا نبخل حتى بالصدقة دي.
بقت المجاملة مصلحة. والمساندة مشاعر مؤقتة.
والتشجيع عملة نادرة.
بس رغم كل ده. لسه فيه ناس طيبة بتعرف تقول الكلمة اللي بتداوي.
خلينا نفتكر دايما اننا مش عارفين اللي قدامنا بيعدي بايه.
ممكن يكون ضاحك. بس جواه وجع.
فكلمة واحدة منك. بحنية. ممكن ترجع له روحه.
ابدأ بكلمة حلوة. يمكن تغير يومه.
ويمكن كمان تغير حياتك انت.
