بقلم: محمد حلمي الديب
أهل ميت حلفا، يا أهلي ويا ناس بلدي، أحب أبدأ كلامي بقول الحقيقة: أنتم مصنع الرجال، وده مش كلام على الفاضي.
من أيام المرحوم فاروق الديب، ومن قبلها، وميت حلفا دايمًا كانت لها كلمة وصوت مسموع في انتخابات مجلس الشعب، وكل مرة أثبتم إنكم على قدر المسؤولية.
يعني لما نقول إن ميت حلفا قرية لا يستهان بها، مش مجرد كلام.. ده واقع، وبتاريخكم الطويل اللي شاهدناه في كل محطة انتخابية، رجالة وفاهمين إيه الصح وإيه اللي يرفع اسم قريتكم ويحافظ على مصالحكم.
أنا شايف النهارده، وإحنا قربنا من انتخابات 2025 جولة الإعادة، إن الفرصة أمامكم أكبر من أي وقت فات، أنتم قادرون تغيّروا المشهد، تختاروا اللي تحسوه مناسب، واللي هينفع دائرة قليوب والقناطر، كل صوت ليكم ليه قيمته، وكل قرار تاخدوه بيحسبه الجميع.
ومتنسوش، القوة الحقيقية مش في الهتاف ولا في الكلام الفاضي.. القوة في الفعل، في الاختيار الصح، في المحافظة على كرامة القرية وسمعتها الطيبة، أنتم أهل الوفاء والجدعنة.
في النهاية، أحب أأكدلكم إن كل خطوة تعملوها لصالح بلدكم ولصالح أهل ميت حلفا، محسوبة، ومقدرّة، وربنا يوفقكم دايمًا لاختيار اللي ينفعكم وينفع دائرتكم، إحنا معاكم قلبًا وقالبًا، ودايمًا متأكد إن ميت حلفا هتفضل رمز للرجولة والمسؤولية.
