إيهاب نجاح جنديه
كل يوم بنسمع إن الشباب مبقاش عايز يتجوز… وإن سن الجواز بقى بيتأخر… وإن المشاكل زادت.
بس عمرنا وقفنا مع نفسنا وسألنا:
مين السبب؟
للأسف… إحنا.
ربنا ورسوله وصّونا إن الاختيار يكون على الدين والخلق، ورسول الله ﷺ قال:
“إذا أتاكم من ترضون دينه وخلقه فزوجوه.”
لكن إحنا قلبنا الموازين.
بقينا نقول:
معاه كام؟
شقته كام متر؟
هيجيب دهب بكام؟
هيدفع كام؟
وعنده عربية ولا لأ؟
أما الدين… والأخلاق… والرجولة… وبناء بيت محترم… بقوا آخر حاجة نفكر فيها.
إيه فايدة “نيش” بيتقفل بالمفتاح، ومحدش بيفتحه غير يوم العيد؟
وإيه فايدة سفرية بمئات الآلاف، وهيتغطى عليها بمفرش طول عمرها؟
وإيه لازمة طلبات كتير مالهاش أي قيمة غير إنها ترهق الشاب وأهله؟
ولو الشاب مش قادر يجيب دهب…
يبقى نلغيه أو نقلله.
ولو مش قادر يجيب كماليات…
يبقى نستغنى عنها.
الجواز مش بيتبني بالذهب…
الجواز بيتبني بالاحترام، والرحمة، والستر.
والغريب إن المعاناة مبتخلصش يوم الفرح…
لا…
دي ساعات بتبدأ بعد الفرح.
تلاقي أب العريس أو أب العروسة داخل في دوامة جديدة اسمها الصباحية والسبوع.
طلبات بالمئات…
مئات الكيلوهات من الخضار…
وفاكهة بكل أنواعها…
وشكاير رز…
وشكاير مكرونة…
وفراخ…
ولحوم…
وحلويات…
وسكر…
وشاي…
وعصائر…
ومياه غازية…
وكأننا بنجهز افتتاح سوبر ماركت… مش بنبارك لعروسين بدأوا حياتهم!
طيب… ليه؟
مين المستفيد؟
هل الكميات دي كلها ضرورية؟
ولا جزء كبير منها بينتهي في القمامة أو بيتوزع لمجرد المظاهر؟
كم أب استلف؟
وكم أم باعت دهبها؟
وكم شاب بدأ حياته غارق في الديون…
عشان يرضي الناس؟
والناس دي نفسها…
بعد أسبوع هتنسى كل اللي اتعمل.
لكن الدين هيبقى في رقبة الأب سنين.
يا جماعة… اتقوا الله.
خففوا عن الشباب.
ارحموا الآباء.
بلاش نكسر ضهر الناس بعادات إحنا اللي اخترعناها.
كل جنيه بيتصرف في المظاهر…
كان أولى بيه إنه يتحط في تأسيس بيت، أو تعليم، أو مشروع، أو مستقبل العروسين.
البركة عمرها ما كانت في النيش…
ولا في كمية الدهب…
ولا في عدد أطباق الفاكهة…
ولا في شكاير الرز والمكرونة.
البركة في رضا ربنا…
وفي التيسير…
وفي بيت يتبني على المودة والرحمة.
وقبل ما أي أب أو أي أم يطلبوا طلب جديد…
اسألوا نفسكم سؤال واحد:
لو ابنك هو اللي واقف مكان العريس… ولو بنتك هي اللي ظروفها صعبة… هل هترضى تطلب منه كل اللي بتطلبه من ولاد الناس؟
لو كانت الإجابة لا…
يبقى بلاش ترضاه على غيرك.
يسروا… ولا تعسروا.
ارحموا… يرحمكم الله.
واتقوا الله في شباب الأمة… فبصلاح البيوت تصلح المجتمعات.
